Doorashadii Somaliland Iyo War Farxad leh

Waraaqaha Codbixinta Doorashooyinka Somaliland oo Soo Gaadhay Hargeysa: Diyaar garowga Doorashada oo Sii Xoogaysanaya.

Maanta ayaa magaalada Hargeysa soo gaadhay waraaqaha codbixinta doorashada Somaliland, kuwaas oo muhiim u ah qabsoomidda doorashada lagu wado inay dhacdo 13-ka November 2024. Soo gaadhitaanka waraaqaha ayaa calaamad u ah in howlaha diyaar garowga doorashada ay si rasmi ah u bilowdeen, iyadoo laga war sugayo wakhtiga loo muddeeyay qabashada doorashadii lagu tartami lahaa kursiga madaxweynaha iyo ururada siyaasada Somaliland.

Diyaar Garowga Doorashada

Guddiga Doorashooyinka Qaranka Somaliland (NEC) ayaa sheegay in soo gaadhitaanka waraaqaha codbixinta ay muujinayso inay diyaar garowgu marayo heerkii ugu dambeeyay. Guddigu wuxuu kaloo ku nuuxnuuxsaday in dhammaan agabyada iyo qalabka doorashada loo baahan yahay ay si habsami ah u socdaan, iyagoo sheegay inay ka go'an tahay in doorashadu u dhacdo si nabad ah, caddaalad ah, oo xor ah.

Waraaqaha codbixinta ayaa ah mid kamid ah qaybaha ugu muhiimsan ee doorasho kasta, maadaama ay yihiin kuwa muwaadiniinta u sahla inay codkooda dhiibtaan si ay u doortaan musharaxiinta ay rabaan. Guddigu waxa uu intaas ku daray in tijaabooyin iyo hubin ballaadhan la sameyn doono si loo xaqiijiyo tayada iyo saxnaanta waraaqahaas.

Musharaxiinta iyo Ololaha Doorashada.

Iyadoo ay soo dhowdahay waqtiga doorashada, musharaxiinta ayaa si weyn ugu guda galay ololahooda doorashada, iyagoo ku tartamaya codka shacabka. Xisbiyada waaweyn ee Somaliland ayaa ku hawlan inay soo bandhigaan barnaamijyadooda siyaasadeed, kuwaas oo ay ku kasbanayaan taageerada codbixiyayaasha.

Doorashadan waxay noqon doontaa mid xiiso leh, iyadoo musharaxiinta u tartamaya xilka madaxweynaha ay isku diyaarinayaan loollan adag. Waxa la filayaa in ololaha doorashada uu si rasmi ah u bilowdo maanta oo ah 19,oct,2024, iyada oo ay guddiga doorashooyinku soo saareen jadwalka rasmiga ah ee ololaha xisbiyada iyo ururada.

Xasiloonida iyo Amniga.

Dowladda Somaliland iyo ciidamada amniga  sidoo kale ku hawl galinaysa sidii loo xaqiijin lahaa in doorashadu u dhacdo jawi nabdoon. Ciidamada amniga ayaa la galin doonaa heegan si looga hortago wax kasta oo khatar ku noqon kara amniga doorashada. Tani waxay qeyb ka tahay qorshaha ballaadhan ee dowladda Somaliland ku doonayso inay hubiso in doorashadu uga dhacdo si nabad ah dhammaan gobollada dalka.

Gabagabo.

Soo gaadhitaanka waraaqaha codbixinta ee magaalada Hargeysa waxay calaamad weyn u tahay diyaar garowga doorashada madaxtinimada iyo urur siyaasadeedka ee Somaliland ee lagu wado inay dhacdo 13-ka November 2024. Muwaadiniinta Somaliland waxay si weyn isha ugu hayaan doorashadan, oo noqon doonta fursad kale oo ay ku muujiyaan rabitaankooda siyaasadeed iyo taageeradooda musharaxiinta kala duwan.

Guddiga Doorashooyinka iyo dhinacyada kale ee ay khusayso ayaa ku hawlan sidii ay u xaqiijin lahaayeen in doorashadu noqoto mid si daahfuran oo hufan u dhacda, iyadoo la rajeynayo in doorashadan ay ka mid noqoto guulaha siyaasadeed ee Somaliland.

WABILLAHI TAWFIIQ