Dhacdooyinkii waaweynaa ee la soo gudboonaaday sannadkii 2004 ururka Xa***s.
Dilkii Sheekh Axmed Yaasin, oo ahaa hoggaamiyihii ruuxiga ahaa ee ururka, wuxuu ahaa mid dareen culus ku reebay Falastiiniyiinta iyo taageerayaashooda caalamka. Si kastaba ha ahaatee, hadaladii uu jeediyey Cabdicasiis Rantiisi markii uu xukunka qabtay ayaa si cad u muujiyey in dhiigga hoggaamiyayaasha ururku uusan marnaba noqon doonin sabab ururka looga niyad-jabo, balse uu noqon doono mid hurinaya halganka.
Cabdicasiis Rantiisi oo Xukunka La Wareegay
Maalintii uu talada la wareegay Cabdicasiis Rantiisi, wuxuu jeediyay khudbad muhiim ah oo uu ku caddeeyey in geerida Sheekh Axmed Yaasin aysan macnaheedu ahayn burburka ururka. Wuxuu yidhi:
"Dhiigga hoggaamiyahayagu waa shiidaalka dib noo hurinaya ee noqon maayo biyo na bakhtiiya."
Rantiisi wuxuu si cad u sheegay in hoggaanka Xamaas uusan ku xirnayn hal qof, balse uu yahay mid ka dhashay halganka dadweynaha oo dhan. Waxaa uu hadalkiisa ku daray in haddii caawa geeridu isaga soo gaadho, Xa***s ay leedahay hoggaamiyeyaal diyaarsan oo sii wadi doona dagaalka iyo halganka.
Dilkii Rantiisi iyo Saameyntiisa.
Bil kadib markii uu hadalkaas jeediyey, Rantiisi ayaa isna lagu dilay weerar ay Yuhuuddu ku qaaday, taas oo ahayd tallaabo kale oo ay isku dayayeen inay ku wiiqaan awoodda Xa***s. Si kastaba ha ahaatee, dilka Rantiisi wuxuu noqday mid markale ururka sii xoojiyey, halkii laga filayay in uu burbur ku keeni doono. Hadalkiisii taariikhiga ahaa ee uu ku sheegay in Xa***s leedahay hoggaamiyeyaal badan oo diyaarsan ayaa dib u soo noolaatay, ururka oo soo bandhigay kartida hoggaamiyaasha cusub sida Khaled Mashcal, Ismaaciil Haniya, iyo Yaxye Sinwaar.
Xa***s Maanta iyo Hoggaanka Cusub.
Xa***s waxay tan iyo wakhtigaas muujisay inay tahay urur leh hoggaan firfircoon oo si wanaagsan u hagi kara dagaalka loogu jiro xornimada Falastiin. Raggii wakhtigaas halganka ku jiray, sida Khaled Mashcal iyo Ismaaciil Haniya oo bilo ka hor ay dileen, weli waa kuwa hoggaanka ku jira, waxayna sii wadaan u halganka xornimada iyo difaaca sharafta Falastiiniyiinta.
Geerida Yaxye Sinwaar, waxay noqon doontaa mid kale oo taariikhda u gasha sida kuwii ka horreeyay. Sinwaar, oo kamid ahaa hoggaamiyeyaasha ugu firfircoon, wuxuu muujiyay in ururka uu sii haysto hoggaamiyeyaal cusub oo diyaar u ah inay sii wadaan halganka. Sida Rantiisi iyo Sheekh Axmed Yaasin, geeridu ma noqon doonto mid laga dhaxlo burbur, balse waxay noqon doontaa mid sii hurinaysa dhiigga halganka iyo xorriyadda.
Gabo-gabo
Geerida hoggaamiyeyaasha Xa***s ma ahan mid burbur ku keeni karta ururka, sida ay taariikhdu marar badan muujisay. Ururka Xa***s wuxuu leeyahay habdhis iyo halgan bulsho oo aan ku tiirsanayn hal qof ama koox kaliya, taas oo ka dhigaysa mid awood badan oo sii wadi karta dagaalka iyo xornima-doonka, iyadoon loo eegin caqabadaha ka hor yimaadda. Taariikhda ururka ayaa marar badan caddeysay in hoggaamiyeyaasha ay geerida ka dhaxlaan awood cusub iyo dhiirrigelin si ay u gaaraan yoolka ay ku haminayaan – xornimada Falastiin.
.png)
0 Comments