Dhagax Dhiga Xarunta Cusub ee Banka Dhex Ee JSL

Madaxweynaha Jamhuuriyadda Somaliland Oo Dhagax-Dhigay Xarun Cusub Oo Loo Dhisayo Baanka Dhexe Ee Somaliland.

Hargeysa - 17-10-2024 - Madaxweynaha Jamhuuriyadda Somaliland, Mudane Muuse Biixi Cabdi, ayaa maanta si rasmi ah u dhagax dhigay xarun cusub oo loo dhisayo Baanka Dhexe ee Somaliland. Xaruntan cusub ayaa noqon doonta mid casri ah oo uu baanku gaar u leeyahay, taas oo wax weyn ka tari doonta habsami u socodka hawlaha maaliyadeed ee dalka.

Munaasibadda dhagax-dhigga xarunta cusub, waxa madaxweynaha ku wehelinayey xubno ka tirsan golaha wasiirrada, madaxda Baanka Dhexe, iyo saraakiil kale oo ka socda hay'adaha kala duwan ee qaranka. Intii lagu guda jiray munaasibadda, waxaa madasha laga jeediyey hadallo lagu bogaadinayo horumarka iyo dedaalka uu baanka dhexe ku hawlan yahay, gaar ahaan dhinaca dhismaha iyo kor u qaadidda adeegyada maaliyadeed.

Hadalka Gudoomiyaha Banka Dhexe.

Guddoomiyaha Baanka Dhexe ee Somaliland, Mudane Cali Cabdilaahi Daahir, oo halkaas ka hadlay, ayaa uga mahadceliyey madaxweynaha dedaalka uu u galay sidii Baanka Dhexe u heli lahaa xarun casri ah oo ku habboon shaqadiisa. Wuxuu sheegay in dhismahan cusub uu noqon doono mid muhiimad weyn u leh habsami u socodka hawlaha baanka iyo adeegyada uu bulshada u qabto.

Hadalka Madaxweynaha.

Madaxweynaha Somaliland, Mudane Muuse Biixi Cabdi, ayaa isna sharraxay muhiimadda uu dhismahan cusub u leeyahay horumarka shaqo ee Baanka Dhexe, isaga oo xusay in baahi weyn loo qabo in hay'adaha kala duwan ee qaranku yeeshaan dhismeyaal bilic leh oo casri ah. Wuxuu sidoo kale sheegay in xaruntani ay wax badan ka tari doonto adeegyada maaliyadeed ee baanku bixiyo, taas oo dhiirigelin u noqon doonta guud ahaan horumarka dhaqaalaha dalka.

Madaxweynaha ayaa ku nuuxnuuxsaday sida uu muhiim u yahay in Somaliland ay yeelato hay'ado ku shaqeeya meelo ku habboon oo u diyaarsan inay la jaanqaadaan baahiyaha casriga ah ee bulshada.

Wa-bilaahi Tawfiiq.